ہم طلبہ نے اپنے دماغ میں ’’دیوبند کی مشہور چیز‘‘ کو سوچتے ہوئے جواب دینے شروع کیے، کسی نے کہا: حضرت فلاں ہوٹل کا حلوہ بہت مشہور ہے، حلوہ خریدوائیں گے۔ کسی نے کہا: حضرت دیوبند کے بیر بہت مشہور ہیں بیر خریدوائیں گے۔ کسی نے کہا: قاضی مسجد کے نیچے جو ’’پلنگ توڑ‘‘ ملتا ہے، وہ بہت زور دار ہوتا ہے، وہ خریدوائیں گے! مفتی صاحبؒ ہر جواب کے بعد اثبات میں سرہلاتے ہوئے اچھا اچھا کہہ رہے تھے، ایک صاحب نے کہا: حضرت پی پی خریدوائیں گے۔ مفتی صاحبؒ نے وضاحت طلب کی کہ یہ پی پی کیا چیز ہے؟ مجیب نے وضاحت کی کہ حضرت یہ جو آپ کے محلے میں بنتی ہے، بچوں کا کھلونا، جسے بجاتے ہیں تو پی پی کی آواز نکلتی ہے۔ اس پر مفتی صاحبؒ کھل کھلاکر ہنسے اور ماشاء اللہ کہا، ان کے ہنسنے سے اہلِ مجلس بھی ہنسے اور اس ماشاء اللہ کہنے نے بھٹکے ہوؤں کو اور بھٹکادیا، سب سے زیادہ بھٹکے وہ جنھوں نے یہ پی پی والا جواب دیا، ان کو لگا کہ میں نے میدان مار لیا، انھوں نے ابھی سے داد طلب نظروں سے اپنے ساتھیوں کی طرف دیکھنا شروع کردیا، ہماری کم عقلیاں دیکھیے کہ اس کے بعد تو ہم طلبہ نے خریدوانے کے لیے جن چیزوں کا انتخاب کیا ان کا معیار اور گرتا چلا گیا، ان جوابوں میں کوشش یہ نظر آرہی تھی کہ ہم بھی حضرت کو ہنسائیں، مفتی صاحبؒ اب اثبات میں صرف سر ہلارہے تھے، زبان سے کچھ نہیں کہہ رہے تھے، ہم نے دیوبند کی مشہور چیز کے ذیل میں وہ وہ چیزیں خریدوادیں جو مشہور بھی نہیں تھیں، جب سب طلبہ اپنے اپنے حساب سے جواب دے چکے تو مجلس میں خاموشی ہوگئی، مفتی صاحبؒ نے آنکھ کھولے بغیر پوچھا: کیاسب کے جواب ہوگئے؟ عرض کیا گیا: جی حضرت!.......... پھر خاموشی، اشتیاق کے مارے تھوڑی دیر کی خاموشی بھی گھنٹوں کی خاموشی لگ رہی تھی، پی پی والے طالب علم نے ازخود پوچھ بھی لیا کہ حضرت کونسا جواب سب سے صحیح رہا؟ پھر بھی خاموشی رہی، ہم طلبہ کان اور آنکھ دونوں ان پر جمائے ہوئے، کچھ دیر بعد آپ نے دایاں ہاتھ قدرے اٹھایا اور آنکھ کھولے بغیر ہی گویا ہوئے:
’’بے قوفو! کتاب خریدوائیں گے کتاب!.......... کیاتم لوگ دیوبند کی مشہور چیزوں میں کتاب کو شامل نہیں مانوگے؟.......... دیوبند کتابوں کا مرکز ہے، حلوؤں، پلنگ توڑوں اور پیپیوں میں تو تم لوگ گھسا رہے ہو، مگر نہیں لے جارہے تو کتاب خانہ نہیں لے جارہے!
اتنا کہا اور خاموش ہوگئے۔ یہ جواب سن کر ہم طلبہ ان کی بڑی سی میز کی آڑ میں سرجھکائے اپنی خفت مٹا رہے تھے اور سوچ رہے تھے کہ ہم کہاں خاک میں تھے اور سوال کرنے والا کہاں ثریا پر تھا، ہرچند کہ یہ جواب آپ نے بصارت کی آنکھ کھولے بغیر دیا تھا؛ مگر یہ جواب ہماری بصیرت کی آنکھیں کھول گیا، اب پتہ چلا کہ وہ جو ہنسنا اور ماشاء اللہ کہنا تھا وہ پیرایۂ تبسم میں افسوس تھا، اس سوال کے ذریعہ آپ نے ہمارا قِبلہ درست کیا اور ہماری ترجیحات میں علم اور متعلقاتِ علم کو سرِ فہرست رکھنے کا قیمتی سبق پڑھایا
اللھم اکرم نزله ووسع مدخله، اللھم انزله منزلا مبارکا و انت خیر المنزلین
