آئینہ ایماں کو جلا دیتا ہے روزہ
دنیاوی مشاغِل کو بھلا دیتا ہے روزہ
اللہ سے بندوں کو ملا دیتا ہے روزہ
انسانوں کو عبادت کے لیے کرتا ہے راغب
ہر خواہشِ نفسانی دبا دیتا ہے روزہ
تقوی الہی کی طرف کرتا ہے مائل
خوشنودیِ رحمن سکھا دیتا ہے روزہ
پابند نماز اور تلاوت کا بناکر
اللہ کا محبوب بنا دیتا ہے روزہ
دنیا میں بزرگی کا سبب ہوتا ہے تقوی
انسان کی عظمت کو بڑھادیتا ہے روزہ
ہوجاتی ہے اس سے عملِ نیک کی تجدید
آئین شریعت کے سکھا دیتا ہے روزہ
کیا فلسفہ افطار و سحرکا ہے جہاں میں
ہر ایک نمازی کو بتا دیتا ہے روزہ
جوگیارہ مہینوں میں میسّرنہیں ہوتی
ایک ماہ میں نعمت وہ کھِلا دیتا ہے روزہ
کس طرح سے فاقوں میں گزرتے دن ان کے
احساس غریبوں کا دلا دیتا ہے روزہ
بوڑھوں کو نیا حوصلہ ہوجاتا ہے پیدا
بچوں میں امنگ اور بڑھادیتا ہے روزہ
اظہر ماہِ رمضان ہے اللہ کی نعمت
انسان کو انسان بنا دیتا ہے روزہ
No comments:
Post a Comment